എന്റെ ആദ്യത്തെ കുഞ്ഞിന്

 

ഹിരോഷി യോഷിനോ യുടെ "ഹാജിമേതെ നൊ കോ നി" എന്ന കവിതയുടെ പരിഭാഷ.

നീ ജനിച്ചതിന്റെ പിറ്റേന്ന്.

കഴുകൻമാരെപ്പോലെ അവർ വന്നു;

ലൈഫ് ഇൻഷുറൻസ് ഏജന്റുമാർ.

അവർ കറുത്ത ലതർബാഗുകൾ

വീണ്ടും വീണ്ടും

തുറന്നടച്ചുകൊണ്ടേയിരുന്നു.

"നിങ്ങളുടെ കാതുകൾ മൂർച്ചയുള്ളതാണല്ലോ!"

ഞാൻ ആശ്ചര്യപ്പെട്ടു.

"ഞങ്ങൾക്ക് അതിന്റെ മണം കിട്ടി."

ചിരിച്ചു കൊണ്ട് അവർ പറഞ്ഞു.

എന്റെ കുഞ്ഞേ,

നിന്റെ മുഖം തിരിച്ചറിയുംവിധം

 രൂപപ്പെട്ടിട്ടുപോലുമില്ലല്ലോ.

പിന്നെപ്പോഴാണ്

നിന്റെ ഈ മൃദുലമേനി

കുഞ്ഞു മരണത്തിനായി

പങ്കുവെക്കപ്പെട്ടത്!!

ഇപ്പോഴിതാ ആ സുഗന്ധം

ഇവിടെമാകെ ഒഴുകിപ്പരക്കുന്നു.

ഈ മണത്തെക്കുറിച്ചാവില്ലേ

അവർ പറഞ്ഞത്?

**********

ഹിരോഷി യോഷിനോ (1926-2014). ജാപ്പനീസ് കവി. ന്യൂമോണിയ ബാധിച്ച് 2014 ജനുവരി 15-ന്  എൺപത്തിയേഴാം  വയസ്സിൽ അന്തരിച്ചു. കവിത, വിമർശനം, വ്യാഖ്യാനം, ഉപന്യാസം എന്നിവ ഉൾപ്പെടെ  66 കൃതികൾ രചിച്ചിട്ടുണ്ട്.

ഹിരോഷി യോഷിനോ സെൻശിത്സു ( ഹിരോഷി യോഷിനോയുടെ കവിതാശേഖരം) ഗെൻദായ്ശി ന്യൂമോൻ (ആധുനിക ചരിത്രത്തിന് ഒരാമുഖം),  ശി നൊ കൊതോബ നൊ ത്സൂരോ (കവിതയും വാക്കിന്റെ വഴിയും), ഹിരോഷി യോഷിനോ ശിഷൂ (ഹിരോഷി യോഷിനോയുടെ കവിതാ സമാഹാരം), തുടങ്ങിയവയാണ് പ്രധാന കൃതികൾ.